Dydd Presgripsiynu Cymdeithasol – 19eg Mawrth 2025
Mae Dydd Presgripsiynu Cymdeithasol yn ddathliad blynyddol o’r bobl, y sefydliadau, a chymunedau anhygoel sy’n dod â phresgripsiynu cymdeithasol yn fyw. Mae hyn yn cynnwys sefydliadau lleol, cenedlaethol a rhyngwladol, gweithwyr cyswllt, gweithwyr meddygol proffesiynol, academyddion, a myfyrwyr.
Mae’r diwrnod yn ymwneud â chodi ymwybyddiaeth o beth yw presgripsiynu cymdeithasol, sut mae’n gweithio, a’r effaith ddofn y mae’n ei gael ar fywydau pobl.
Gofynom i Bobbie Bowden beth sy’n rhoi’r boddhad mwyaf iddi am ei rôl fel Cysylltydd Cymunedol PAVO ar gyfer Llanfyllin:
“I mi, mae’n golygu cael sgwrs ‘Beth sy’n Bwysig’ gyda phob person i ddeall y rhwystrau y maent yn eu hwynebu wrth ddod o hyd i hapusrwydd, llawenydd a chysylltiad – ac yna eu helpu i oresgyn y rhwystrau hynny.
“Mae’n ddull holistaidd sy’n edrych ar bob agwedd ar fywyd person, gan gynnwys datrys problemau a gweithio’n agos gyda gwahanol asiantaethau a gwasanaethau statudol i gynnig cefnogaeth dosturiol.
“Rwy’n meddwl ei bod yn anhygoel bod presgripsiynu cymdeithasol bellach yn opsiwn.
“Gyda gwasanaethau statudol yn brysurach nag erioed, rwy’n teimlo’n falch y gallwn helpu i lenwi’r bwlch hwn Rydym yn gweithio ochr yn ochr â meddygfeydd a gwasanaethau eraill i gefnogi pobl nad ydynt efallai angen gofal meddygol ond sydd angen cymorth gan rywun.
“Fel gwasanaeth amhenodol, mae gennym ni’r hyblygrwydd i gefnogi pobl mewn llawer o wahanol feysydd o’u bywydau, bob amser yn cael eu harwain ganddyn nhw a’u hanghenion.”
Rhannodd Bobbie enghraifft o sut y gwnaeth ei chefnogaeth wahaniaeth gwirioneddol i fywyd rhywun:
“Un senario sy’n sefyll allan oedd helpu menyw a oedd wedi colli ei gŵr ac a oedd yn cael trafferth ailgysylltu â’i chymuned.
“Roedd hi wedi bod yn weithgar iawn mewn grwpiau a gweithgareddau lleol o’r blaen, ond ar ôl i’w gŵr farw, camodd yn ôl am dros flwyddyn.
“Cyfeiriodd ei meddyg teulu hi ataf oherwydd ei bod yn teimlo pwysau gan ffrindiau a theulu i ‘fynd yn ôl allan yna’.
“Ar ôl sgwrs ‘Beth sy’n Bwysig’ sylweddolais nad oedd hi wedi prosesu marwolaeth ei gŵr yn llawn ac roedd hi’n teimlo’n sownd ac yn unig yn ei galar.
“Trefnais atgyfeiriad ar gyfer cwnsela galar a chsylltu efo hi yn rheolaidd dros ychydig wythnosau. Bob tro y buom yn siarad, roedd yn teimlo ychydig yn fwy galluog, ac yn y pen draw, roedd yn barod i ddechrau cymdeithasu eto.
“Ond roedd rhwystr arall – doedd ganddi hi ddim trafnidiaeth. Ei gŵr oedd wastad yn gyrru, ac redden nhw’n gwneud popeth gyda’i gilydd, felly fe wnes i ei chysylltu â chynllun trafnidiaeth gymunedol lleol.
“Erbyn diwedd y broses, roedd hi’n mynychu’r holl grwpiau roedd hi’n eu mwynhau cyn i’w gŵr farw.
“Dywedodd wrthyf fod cael rhywun i siarad â hi a dilysu ei phrofiad wedi gwneud byd o wahaniaeth. Roedd gwybod bod rhywun yn meddwl amdani ac yn cysylltu efo hi wedi rhoi’r hyder iddi gamu’n ôl i’r byd.
“Po hiraf y byddwn yn ynysu ein hunain, yr anoddaf yw hi i gymryd y cam cyntaf hwnnw yn ôl i’n cymuned.
Ynglŷn â Gwasanaeth Cysylltwyr Cymunedol PAVO
Mae Cysylltwyr Cymunedol PAVO yn cefnogi pobl 18 oed a throsodd drwy eu helpu i gael mynediad at wasanaethau lleol, gan gynnwys trafnidiaeth, budd-daliadau a chymorth ariannol, adnoddau iechyd a lles, cymorth gwirfoddol, a gweithgareddau cymunedol.
Wedi’i ariannu gan Fwrdd Partneriaeth Rhanbarthol Powys, mae’r gwasanaeth yn canolbwyntio ar yr unigolyn a rhoi’r ffocws ar yr hyn sydd bwysicaf i bob unigolyn. Trwy ddarparu arweiniad a chysylltu â chymorth anghlinigol, mae’r gwasanaeth yn grymuso pobl i wneud penderfyniadau gwybodus am eu lles.