Grant o £90,000 i helpu i fynd i’r afael â thlodi plant ym Mhowys

Cyhoeddwyd y bydd ymdrechion i fynd i’r afael â thlodi plant ym Mhowys yn cael hwb diolch i grant o £90,000 gan Lywodraeth Cymru.

Mae Cyngor Sir Powys wedi bod yn llwyddiannus wrth sicrhau cyfran o’r £900,000 o Gynllun Grant Arloesi a Chefnogi Cymunedau Tlodi Plant Llywodraeth Cymru.

Bydd y cyllid yn gweld y cyngor a’i bartner Sefydliad Mudiadau Gwirfoddol Powys (PAVO) yn cydweithio ar fentrau peilot i fynd i’r afael â thlodi plant yn y sir. Mae’r mentrau, a fydd hefyd yn llywio gwaith y Tasglu Tlodi Plant yn y dyfodol, yn cynnwys:

• Swyddog Gwirfoddoli a gyflogir gan PAVO a fydd yn gweithio gyda phobl ifanc 14-25 oed i nodi cyfleoedd gwirfoddoli;
• Bydd dull cyfathrebu cydlynol yn cael ei dreialu i wella mynediad at wybodaeth i unigolion a gweithwyr proffesiynol sy’n eu cefnogi;
• Cynnig cynllun grantiau bach i fentrau sy’n canolbwyntio ar y gymuned sy’n cefnogi plant, pobl ifanc a theuluoedd;
• PAVO i recriwtio Rhagnodydd Cymdeithasol Plant a Phobl Ifanc a fydd yn darparu cymorth penodol i blant, pobl ifanc a’u teuluoedd, drwy sgyrsiau ‘beth sy’n bwysig’, gan gynnig dull holistaidd gyda phwyslais ar atal ac ymyrryd yn gynnar

Dywedodd y Cynghorydd Matthew Dorrance, Dirprwy Arweinydd Cyngor Sir Powys ac Aelod Cabinet dros Bowys Decach: “Rwyf wrth fy modd ein bod ni wedi sicrhau’r cyllid grant hwn gan Lywodraeth Cymru, a fydd yn gwneud gwahaniaeth gwirioneddol wrth i ni barhau â’n gwaith o fynd i’r afael â thlodi plant yma ym Mhowys.

“Mae’r cyngor a’n partneriaid wedi ymrwymo i weithio gyda’n gilydd a gyda’n cymunedau i fynd i’r afael â’r mater hwn gan fod tlodi plant yn parhau i effeithio ar ormod o deuluoedd.

“Bydd y mentrau hyn y bydd y cyngor a PAVO yn eu goruchwylio yn bwysig wrth i ni barhau i gyflawni Cynllun Gweithredu Tasglu Tlodi Plant Powys.

“Mae gweithio mewn partneriaeth yn allweddol a gyda’n gilydd gallwn fynd i’r afael â thlodi plant er mwyn adeiladu Powys gryfach, decach, wyrddach.”

Dywedodd Clair Swales, Prif Weithredwr PAVO: “Mae’r cyllid hwn yn rhoi cyfle gwych i weithio’n agos at bobl ifanc a theuluoedd ledled Powys.

“Trwy ganolbwyntio ar atal ac ymyrryd yn gynnar, gallwn gynnig cefnogaeth bwrpasol sy’n mynd i’r afael â’r heriau unigryw sy’n wynebu pobl sy’n byw yn y sir.

“Rydym yn gobeithio y bydd partneriaeth â Chyngor Sir Powys a’r Tasglu Tlodi Plant yn gwella effaith gadarnhaol y prosiectau tymor byr hyn, sydd o fudd i bobl sy’n byw ym Mhowys ac yn amlygu pwysigrwydd rhaglenni cymunedol wrth leihau effaith tlodi.”